آه يا قلبى يانا يا موجوع

آه يا قلبى يانا يا موجوع

بقلم / أمانى صلاح الدين

 

آه يا قلبى يانا يا موجوع

ياللى كل ليلة تقوم مفزوع

مش م العطش واللا قرصة جوع

 

آه يا قلبى تعبت كتير وبالقوى

من وش غشاش وتانى فهلوى

من هم رايح وهم تانى لسه بيستوى

 

آه ياقلبى لما البرئ يموت بدون جريمة

والجلاد يحس إنه كسب وفاز بالغنيمة

ونسى إن ربنا أخدته أخده شديدة أليمة

 

آه يا قلبى لما ناس ليل نهار شغالة

وناس تانية تروح تاكل من الزبالة

وغيرهم من دمنا ولحمنا عايشين عوالة

 

آه يا قلبى ع الجسد لما اتقسم نصين

والعدو قام واترسم ياكل منين

الشمال واللا االجنوب واللا اللى هنا تايهين

 

آه يا قلبى لما الغلبان بيتقهر

وضعيف الإيمان بيروح ينتحر

والسفيه والإمعة هو اللى بيتعرف وبيتشهر

 

آه يا قلبى لما صوت الحق يترعش

وصوت الباطل هو اللى يعلى وينتعش

كله نصب كله كذب كله غش ف غش

 

آه يا قليى لما الشباب يكون كده كل همه

يقلع قميصه واللا يحلق واللا يشمر كمه

واللا واحد يضرب له فيزا ويضحك عليه ويخمه

 

آه يا قلبى لما يعود الإسلام غريب

واللى ماسك عليه كأنه ماسك لهيب

لكنه صابر وعارف إن فرج ربه قريب

 

لكن يا قلبى لازم تغير حياتك

وتخلى دايما فى ايدك طوق نجاتك

إيمانك بربك وقرآنك وسنتك وصلاتك