فيه ناس ...... وناس
بقلم / أمانى صلاح الدين
فيه ناس للتقوى قلوبها متشوقة
وناس كتيرة تانية بالهلس متعلقة
وناس بتشرب من نهر الخير بحور
وناس بتاخد منه يادوب بالمعلقة
فيه ناس جاهدت كتير وضحت
وناس تانية تموت لو عاشوا لحظة شقا
فيه ناس قلوبها دايما متوحدة
وناس مهما اتلمت قلوبها متفرقة
فيه ناس ...... وناس
فيه ناس صلاتها صلاة مؤمنين
وناس كتيرة تانية يادوب مؤديين
فيه ناس صلاتها صلاة القلوب
وناس مع الدنيا وهمها سرحانين
فيه ناس صلاتها صلاة الخشوع
وناس فى كل مكان عينيهم حيرانين
فيه ناس بتصليها على وقتها
وناس تانية نسيوها وعنها سهيانين
فيه ناس ...... وناس
فيه ناس صيامها للروح صيانه
وناس صيامها يادوب معدة جعانة
فيه ناس صيامها بيرفع لفوق
وناس ينزلهم لأوطي مكانه
فيه ناس صيامهم صون اللسان
وناس الشر في لسانها لبانه
فيه ناس صيامها صيام الجوارح
وناس صيامها نفوس زهقانه
فيه ناس ...... وناس
فيه ناس باره بأبوها وأمها
وناس نسيت يعني ايه تبرها
فيه ناس حطوهم جوه عيونهم
وناس حطتهم ورا ظهرها
فيه ناس كتيرة عرفت فضلهم
وناس جاحدة وناسيه فضلها
فيه ناس حطوهم فوق الدماغ
وناس تانيه م القسوة طيرت عقلها
فيه ناس ...... وناس
{أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلَا يَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الْأَمَدُ فَقَسَتْ قُلُوبُهُمْ وَكَثِيرٌ مِّنْهُمْ فَاسِقُونَ}
ردحذف