سيادتها … !!
بقلم / أمانى صلاح الدين
سيادتها على الفقير* تاخده كده فى حديد
سيادتها على الأمير* تبنى له قصر جديد
سيادتها على الغلبان *جابت له يا ناس جنان
سيادتها على المليان* بتملى خزاينه كمان
سيادتها على المعدوم * بتبيعـــــــــه الهدوم
سيادتها على المخدوم * بتزوده خُـــــــدام
سيادتها على الشيوخ * وراهم بالمرصاد
سيادتها على اللطوخ * بتخليهم أســـياد
سيادتها على الجيران * تبنى لهم الجدار
سيادتها على الأعداء * تساعدهم ع الحصار
سيادتها على المظلوم * ضرب وإهانة وشوم
سيادتها على الظُلام * شجب وعتاب ولوم
سيادتها على الإسلام * ياللا كده السلام
سيادتها على كلهم * هس مفيش كلام
سيادتها على المحتاج * مش بيلاقى العلاج
سيادتها ع اللى معاه * لا دمل ولا خراج
سيادتها على الحبيب * قاسية كده ومتعبة
سيادتها على الهليب * دايما عليه مطبطبة
سيادتها دى بحبها * مهما قسى قلبها
ومسيرها فيوم حتعرف * حبيبها من عدوها
سيادتها جوه قلبى * حبيبتى ونور عنيه
ونفسى تكون معايا * معايا مش عليه
سيادتها أمى وأبويا * ونيل منه بتروى
ومهما عملت معايا * عمرى ما اقدر أتلوى
سيادتك أنا بعاتبك * وباشكى منك ليكِ
نفسى تنظفى أرضك * وترجع الجنة فيكِ
ليست هناك تعليقات:
إرسال تعليق